செவ்வாய் தோஷம் ஏன் ஏற்படுகிறது? செவ்வாய் தோஷத்திற்கான பரிகாரங்கள்

செவ்வாய் தோஷம் என்றால் என்ன?

திருமணத்திற்கு ஜாதக பொருத்தம் பார்க்கும்போது முக்கியமாக பார்க்கபடும் ஒன்று செவ்வாய் தோஷமாகும். செவ்வாய் தோஷம் இருப்பவருக்கு திருமணம் தாமதமாக நடைபெறும், அல்லது திருமணம் நடைபெறுவதில் பல்வேறு தடைகள் ஏற்படும். ஜாதகத்தில் லக்னத்திலிருந்து 2,4,7,8,12 ஆகிய இடங்களில் செவ்வாய் இருந்தால் அது செவ்வாய் தோஷமாக கருதப்படுகிறது.

செவ்வாய் தோஷம் எவ்வாறு ஏற்படுகிறது?

முற்பிறவியில் செய்த பாவங்கள் மற்றும் வாழ்க்கை துணையை கொடுமை படுத்துபவர்களுக்கு செவ்வாய் தோஷம் ஏற்படும் என கூறப்படுகிறது.

செவ்வாய் தோஷத்தால் உண்டாகும் பிரச்சனைகள்

ஜாதகத்தில் செவ்வாய் தோஷம் இருப்பவர்களுக்கு திருமண தடை, திருமண முயற்சி தோல்வி, திருப்தியில்லாத மணவாழ்க்கை, சந்தேக குணம், பிரிவு, குழந்தையின்மை, மாங்கல்ய பலமில்லாமல் இருப்பது, சகோதர சகோதரிகளுடன் ஒற்றுமை குறைவு, பூர்வீக சொத்துக்களான நிலம், வீடு சம்பந்தப்பட்ட வழக்குகள் இழுபறி, ஆயுள் பலமின்மை, கடன் தொல்லை போன்ற பிரச்சனைகள் செவ்வாய் தோஷத்தால் ஏற்படும் என்பது ஜோதிட நம்பிக்கை ஆகும்.

செவ்வாய் தோஷம் உள்ளவர்களின் திருமணம்

செவ்வாய் இரத்ததுக்கு அதிபதியாவார். செவ்வாய் தோஷம் உள்ளவர்களுக்கு மற்றவர்களை விட சற்று அதிக உணர்ச்சி இருக்கும். அந்த உணர்ச்சியானது சிலருக்கு கோபமாகவும், சிலருக்கு வேகமாகவும், ஒரு சிலருக்கு காம உணர்ச்சியாகவும் இருக்கும். செவ்வாய் ஆதிக்கம் பெற்றவர்களுக்கு தாம்பத்தியத்தில் அதிக விருப்பம் இருக்கும். ஆனால் செவ்வாய் தோஷம் இல்லாதவர்கள் காலப் போக்கில் தாம்பத்தியத்தில் ஆர்வம் குறையும்.

தோஷம் உள்ளவர்களுக்கு, தோஷம் இல்லாதவர்களை திருமணம் செய்து வைத்தால், அவர்களுக்கிடையில் தாம்பத்திய ரீதியான பிரச்சனைகள் ஏற்படும் வாய்ப்புகள் அதிகம். அதனால் தான் செவ்வாய் தோஷம் உள்ளவர்களுக்கு அதே போல செவ்வாய் தோஷம் கொண்ட ஜாதகம் கொண்ட ஒருவரை திருமணம் செய்ய வேண்டும் என்கின்றனர் பெரியோர்கள்.

செவ்வாய் உள்ளவர்கள் ஆணோ, பெண்ணோ இருவரும் அதே போன்ற செவ்வாய் தோஷம் உள்ள வரனையே மட்டுமே திருமணம் செய்து கொள்ள வேண்டும். ஒருவருக்கு செவ்வாய் தோஷம் இருந்து இன்னொருவருக்கு செவ்வாய் தோஷம் இல்லை என்றால் வாழ்க்கை துணையை பிரிந்து வாழும் சூழ்நிலை ஏற்படும் அல்லது துணையின் இழப்பை சந்திக்கும் நிலை ஏற்படலாம்.

செவ்வாய் தோஷத்திற்கான விதிவிலக்குகள்

1. மேஷம், விருச்சிகம், மகரம் ஆகிய வீடுகளில் செவ்வாய் இருந்தால் செவ்வாய் தோஷம் இல்லை.
2. குரு, சூரியன், சனி சந்திரனுடன் சேர்ந்திருந்தால் செவ்வாய் தோஷமில்லை.
3. சிம்மம் அல்லது கும்பத்தில் செவ்வாய் இருந்தால் செவ்வாய் தோஷம் இல்லை.
4. 2 ஆம் இடமானது மிதுனம் அல்லது கன்னியாக இருந்தால் செவ்வாய் தோஷமில்லை.
5. 4 ஆம் இடம் மேஷம், விருச்சிகமானால் தோஷமில்லை.
6. 7 ஆம் இடம் கடகம், மகரமானால் தோஷமில்லை.
7. 8 ஆம் இடம் தனுசு, மீனம் இருந்தால் தோஷமில்லை.

மேலும் விரிவான செவ்வாய் தோஷ விதிவிலக்குகளை இங்கே கிளிக் செய்வதன் மூலம் அறியலாம்.

செவ்வாய் தோஷத்திற்கான பரிகாரங்கள்

ஜாதகத்தில் செவ்வாய் தோஷம் இருந்தாலும் முறையான பரிகாரங்கள் மற்றும் வழிபாடுகள் மேற்கொள்வதன் மூலம் செவ்வாய் தோஷத்தின் கடுமையை குறைக்கலாம்.

1. செவ்வாய் கிழமைகளில் முருகன் மற்றும் முருகனின் அம்சம் கொண்ட அங்காரகனையும் சன்னதியில் வழிபட்டு வந்தால் செவ்வாயின் தோஷத்தின் தாக்கம் குறையும்.

2. முருகனுக்கு சிவப்பு நிற மலர்கள் கொண்டு அர்ச்சனை செய்து வழிப்பட்டால் செவ்வாய் தோஷம் விரைவில் விலகும்.

3.. செவ்வாய் கிழமை வரும் சதுர்த்தி நாளில் கணபதிக்கு அபிஷேக ஆராதனை செய்து விரதம் இருந்து வந்தால் நல்லது நடக்கும். இவ்வாறு 41 செவ்வாய்கிழமைகள் விரதம் இருக்க வேண்டும்.

4. செவ்வாய்க்கிழமை மிருகசீரிடம் நட்சத்திரத்தில் துவரை தானம் செய்து வந்தால் செவ்வாயின் தோஷத்தின் கடுமை குறையும்.

5. செவ்வாய் தோஷம் உள்ளவர்கள் செவ்வாய் காயத்ரீ மந்திரம், தியான மந்திரம், சூரிய கவசம் போன்றவற்றை துதித்து கடவுளை மனமுருகி வழிபட்டு சொல்லி வந்தால் செவ்வாய் தோஷம் விலகும்.

6. செவ்வாய் தோஷக்காரர்கள் சிவப்பு கல் பதித்த தங்க மோதிரத்தை மோதிர விரலில் அணிந்து கொள்ளலாம். இதன் மூலம் செவ்வாயின் கடுமை குறையும்.

7. நவகிரகங்கள் உள்ள ஆலயங்களில் செவ்வாய் கிரகத்துக்கு 27 செவ்வாய் கிழமைகள் நெய் விளக்கு போட்டு வந்தால் செவ்வாய் தோஷம் விலகும்.

நவகிரக செவ்வாய்க்கு பிறந்ததேதி அல்லது கிழமைகளில் அர்ச்சனைச் செய்வதால் நன்மை உண்டாகும். இதுபோன்ற பரிகாரங்கள் செய்வதன் மூலம் செவ்வாய் தோஷம் விலகி வாழ்க்கை செழிப்பாகும்.

செவ்வாய் தோஷம் உள்ளவர்கள் செல்ல வேண்டிய ஆலயங்கள்

செவ்வாய் தோஷம் உள்ளவர்களுக்கு சீர்காழியில் அமைந்துள்ள வைத்தீஸ்வரன் கோவில் சிறப்பு வாய்ந்த பரிகார தலமாக விளங்குகிறது.

மேலும்

1. சுப்ரமணியசுவாமி, சென்னிமலை, ஈரோடு.
2. சங்கமேஸ்வரர், பவானி, ஈரோடு.
3. கந்தசுவாமி, திருப்போரூர், காஞ்சிபுரம்.
4. மலையாள தேவி துர்காபகவதி அம்மன், நவகரை, கோயம்புத்தூர்.
5. அமிர்தகடேஸ்வரர், மேலக்கடம்பூர், கடலூர்.
6. அருணஜடேசுவரர், திருப்பனந்தாள், தஞ்சாவூர்.
7. கைலாசநாதர், கோடகநல்லூர், திருநெல்வேலி.
8. வீரபத்திரர், அனுமந்தபுரம், காஞ்சிபுரம்.
9. கல்யாண கந்தசுவாமி, மடிப்பாக்கம், சென்னை.
10. அகஸ்தீஸ்வரர், வில்லிவாக்கம், சென்னை.
11. தேனுபுரீஸ்வரர், திருப்பட்டீசுவரம், தஞ்சாவூர்.
12. அகோர வீரபத்திரர், வீராவாடி, திருவாரூர்.
13. பிரளயநாதசுவாமி, சோழவந்தான், மதுரை.
14. விருத்தபுரீஸ்வரர், திருப்புனவாசல், புதுக்கோட்டை.
15. சுப்பிரமணியர் காங்கேயன், காங்கேயநல்லூர், வேலூர்.
16. ஏழுமலையான், திருப்பதி, ஆந்திரா

போன்ற கோவில்களுக்கு சென்று வழிபட்டு செவ்வாய் தோஷம் விலகி வளமோடு வாழலாம்.

செவ்வாய் தோஷம் என்றால் என்ன? செவ்வாய் தோஷ விதிவிலக்குகள் யாவை

செவ்வாய் தோஷம்

திருமணத்திற்கு வரன் பார்த்து பொருத்தம் பார்க்கும்போது முக்கியமாக பார்க்கப்படும் ஒரு விஷயம் பிள்ளைக்கோ அல்லது பெண்ணுக்கோ ஜாதகத்தில் செவ்வாய் தோஷம் உள்ளதா என்பதுதான். இந்த செவ்வாய் தோஷம் கிட்டத்தட்ட பலருடைய வாழ்க்கையை புரட்டி போட்டு விடுகிறது. ஜாதகத்தில் செவ்வாய் தோஷம் இருக்கும் காரணத்தால் பல பெண்கள் மற்றும் ஆண்களின் வாழ்க்கையில் திருமணம் உரிய வயதில் நடக்காமல் தடைப்படுவதை நாம் அன்றாட வாழ்க்கையில் கண்கூடாக பார்க்கலாம்.

செவ்வாய் தோஷத்தை எவ்வாறு அறிவது

ஜாதகத்தில் லக்னமானது, சந்திரன், சுக்கிரன் ஆகியவை 2, 4, 7, 8, 12 ஆகிய இடங்களில் செவ்வாய் எங்கு இருந்தாலும் அந்த ஜாதகம் செவ்வாய் தோஷ ஜாதகமாக கருதப்படுகிறது. பொதுவாக இந்த இடங்களில் பாவ கிரகங்கள் இருப்பதும் ஒருவகையில் தோஷம்தான்.

செவ்வாய் தோஷ விதிவிலக்குகள்

சில ஜாதகங்களில் செவ்வாய் தோஷ இருந்தாலும் அதில் சில விதிவிலக்குகள் உள்ளதாக ஜோதிட சாஸ்திரங்களில் சொல்லப்பட்டுள்ளது. அவற்றை பற்றி சிறிது விரிவாக காண்போம்,

1. ஜாதகத்தில் லக்னமானது, சந்திரன், சுக்கிரன் ஆகியவைகளுக்கு 2, 4, 7, 8, 12 ஆகிய இடங்களில் செவ்வாயின் ஆட்சி வீடுகளான மேஷம், விருச்சிகம், உச்ச வீடான மகரம் என்று இருந்து அந்த இடத்தில் செவ்வாய் இருந்தால், செவ்வாய் தோஷம் இல்லை. மேலும் அந்த இடங்களில் செவ்வாய் இருந்து, சூரியன், குரு, சனி ஆகியோர் சேர்ந்து இருந்தாலும் செவ்வாய் தோஷம் இல்லை. மேலும் அந்த இடங்களில் உள்ள செவ்வாய்க்கு சூரியன், குரு, சனி ஆகியவர்களின் பார்வை பட்டிருந்தாலும் செவ்வாய் தோஷம் இல்லை.

2. லக்னத்தைப் பொறுத்தவரை கடக லக்னம், சிம்ம லக்னம் ஆகிய லக்னத்தில் பிறந்தவர்களுக்கு செவ்வாய் எந்த இடத்தில் இருந்தாலும் செவ்வாய் தோஷம் இல்லை.

3. செவ்வாய் இருக்கக்கூடிய 2- இடமானது மிதுனம் அல்லது கன்னியாக இருந்தால் அந்த ஜாதகத்தில் செவ்வாய் தோஷம் இல்லை.

4. செவ்வாய் 4-ல் இருந்து அந்த இடம் மேஷம், விருச்சிகம் ஆகிய ராசிகளாக இருந்தால் அது செவ்வாய் தோஷ ஜாதகம் இல்லை.

5. களத்திர ஸ்தானத்தில் செவ்வாய் இருந்து, அந்த ஸ்தானமானது கடகமாகவோ அல்லது மகரமாகவோ இருந்தால் அது செவ்வாய் தோஷம் இல்லை.

6. செவ்வாய் இருக்கும் 8-வது இடமானது தனுசு அல்லது மீனமாக இருந்தாலும், 12-வது இடம் ரிஷபம், துலாமாக இருந்தாலும் இந்த செவ்வாய் தோஷம் இல்லை.

7. ஒருவரின் ஜாதகத்தில் செவ்வாயானது சிம்மம் அல்லது கும்பத்தில் இருந்தால் செவ்வாய் தோஷம் இல்லை. செவ்வாய் குருவுடன் சேர்ந்திருந்தாலும் செவ்வாய் தோஷம் இல்லை.

8. சந்திரனுடன் சேர்ந்து மேலே சொன்ன எந்த இடத்தில் செவ்வாய் இருந்தாலும் செவ்வாய் தோஷம் இல்லை.

9. மேலே சொன்ன இடங்களில் செவ்வாய் இருந்து புதன் அல்லது சூரியனுடன் சேர்ந்திருந்தாலோ அல்லது அவர்களால் பார்க்கப்பட்டாலோ செவ்வாய் தோஷம் இல்லை.

10. மேஷம், சிம்மம், விருச்சிகம், மகரம் ஆகிய ராசிகளில் செவ்வாய் இருந்து, அந்த இடம் இந்த தோஷத்தைக் குறிப்பிடும் 8-ம் இடமாகவோ அல்லது 12-வது இடமாகவோ இருந்தாலும் செவ்வாய் தோஷம் இல்லை.

11. சனி, ராகு, கேது ஆகியோருடன் சேர்ந்திருந்தாலும் செவ்வாய் தோஷம் இல்லை.

12. செவ்வாய்க்கு நட்பு கிரகங்களான சூரியனின் ஆட்சி வீடான சிம்மம், சந்திரனின் ஆட்சி வீடான கடகம், குருவின் ஆட்சி வீடுகளான தனுசு, மீனம் ஆகிய இடங்களில் செவ்வாய் இருந்து, அந்த இடம் லக்னம், சந்திரன், சுக்கிரன் ஆகியவைகளுக்கு 2, 4, 7,8, 12 ஆகிய இடங்களாக இருந்தாலும் செவ்வாய் தோஷம் இல்லை.

திருமணத்திற்கு ஜாதகம் பார்க்கும்போது மணப்பெண் அல்லது மணமகன் இருவரில் ஒருவருக்கு செவ்வாய் தோஷம் இருந்து மற்றவர்க்கு தோஷம் இல்லை என்றால், அவர்களுக்கு திருமணம் செய்யக்கூடாது.

Tag: செவ்வாய் தோஷம் நிவர்த்தி