வசியப் பொருத்தம் என்றால் என்ன?
வசியப் பொருத்தம் என்பது கணவன், மனைவி இருவருக்கும் வசியத்தை ஏற்படுத்தி வாழ்நாள் முழுவதும் பூரண அன்புடன், ஒருவருக்கொருவர் இன்பமுடன் வாழ்வார்களா என்பதை அறிய பார்க்கப்படும் ஒரு பொருத்தம் ஆகும். கணவன், மற்றும் மனைவி இருவரும் ஒருவரை ஒருவர் விரும்பி, அன்புடன் இரண்டறக் கலக்கும் நிலையை அடைய வசியப் பொருத்தம் சிறப்பாக அமைய வேண்டியது அவசியம்.
வசிய பொருத்தம் அமைந்த தம்பதிகள் வாழ்நாள் முழுவதும் அன்புடனும், நிம்மதியுடனும் வாழ்வார்கள். தம்பதிகளுக்குள் அலட்சியம், மந்தம், சலிப்பு போன்றவை ஏற்படாது. வசிய பொருத்தம் இருந்தால் ஒருவருக்கொருவர் வசியமாகி, எந்த சந்தர்ப்பத்திலும் ஒருவரை மற்றவர் விட்டுக் கொடுக்காமல் பூரண அன்புடன் இனிய வாழ்க்கை நடத்துவார்கள்.
ஜோதிட சாஸ்திரத்தின்படி மனதை ஆள்வது சந்திரன் என்பதாலும், சந்திரன் ராசியதிபதி என்பதாலும், இந்த வசியப் பொருத்தத்தின் படி திருமணம் செய்தால் மனப்பொருத்தம் இல்லாத தம்பதிகள் கூட நாளடைவில் ஒருவரை ஒருவர் பிரிக்க முடியாத அன்பும், பிணைப்பும், உறவும் கொண்டு தமது வாழ்நாள் முழுவதும் ஆனந்தமான வாழ்க்கை வாழ்வார்கள். இதற்காகத்தான் வசியப் பொருத்தம் பார்க்கப்படுகிறது.
வசிய பொருத்தம் எவ்வாறு பார்ப்பது?
ஒவ்வொரு ராசியும் அதற்கு ஏற்றார்போல இருக்கும் வசியம் உள்ள ராசியுடன் மட்டும் தான் பொருந்தும். ஒவ்வொரு ராசிக்கும் ஒரு குறிப்பிட்ட ராசி வசியப் பொருத்தம் ஆகும். பெண்ணின் ராசி எந்த மாதிரியான ஆணின் ராசியுடன் பொருந்தும் என்ற அட்டவணை கீழே கொடுக்கப்பட்டுள்ளது.
அவை :
1. மேஷம் – சிம்மம், விருச்சிகம்
2. ரிஷபம் – கடகம், துலாம்
3. மிதுனம் – கன்னி
4. கடகம் – விருச்சிகம், தனுசு
5. சிம்மம் – மகரம்
6. கன்னி – ரிஷபம், மீனம்
7. துலாம் – மகரம்
8. விருச்சிகம் – கடகம், கன்னி
9. தனுசு – மீனம்
10. மகரம் – கும்பம்
11. கும்பம் – மீனம்
12. மீனம் – மகரம்.
பெண் ராசிக்கு ஆண் ராசி வசியம் என்றால் வசியப் பொருத்தம் உண்டு.
பெண் ராசிக்கு ஆண் ராசி வசியம் இல்லை என்றால் வசியப் பொருத்தம் இல்லை.
பெண் ராசிக்கு ஆண் ராசி வசியமானால் உத்தமம்.
ஆண் ராசிக்கு பெண் ராசி வசியமானால் மத்திமம்.
வசிய பொருத்தம் இல்லையென்றால் திருமணம் செய்யலாமா?
பொதுவாக பெண் ராசி மற்றும் நட்சத்திரத்தை வைத்தே பொருத்தம் பார்க்கபடுகிறது. பத்து பொருத்தங்களில் மற்ற எல்லா பொருத்தங்களும் பொருந்தி வசியப் பொருத்தம் மட்டும் இல்லை என்றால் திருமணம் செய்யலாம் என்பது பொதுவான கருத்து. வசீகரிக்கும் சுக்கிரனும், மனதுக்கு அதிபதியான சந்திரனும் அவரவர்களின் ஜாதகத்திற்குரிய புத்தி ஸ்தானமான 5ம் இடத்தை பொறுத்து அமைகிறது.
அதே போல ஜாதகத்தில் ஆயுள் ஸ்தானத்தையும், ஆயுள்காரகனாகிய சனி பகவான், லக்னாதிபதி பலம் ஆகியவற்றை கொண்டுதான் ஆயுளை தீர்மானிக்க முடியும். அது போல வசியப் பொருத்தம் ஆனது, ஜோதிட சாஸ்திரப்படி ஒரு பொது விதியே தவிர முக்கியம் என்று இல்லை. அதனால் வசிய பொருத்தம் இல்லாவிட்டாலும் திருமணம் செய்யலாம்.
மற்ற திருமண பொருத்தங்களின் பலன்கள் மற்றும் திருமண சடங்களுக்கான காரணங்கள் அறிய இங்கே க்ளிக் செய்யவும்.